BOSE QC30 & QC35 用後感 – 藍牙真係令人又愛又恨

BOSE QC30 & QC35 用後感 – 藍牙真係令人又愛又恨


話時話,其實石先生作為 BOSE 嘅粉絲,用左 QC20 及 FreeStyle 耳塞式耳機咁耐,一直都好想試近出嘅 QC30 及 QC35,始終有線耳機成日都有啲野「吊下吊下」,用落始終唔夠方便。等左一輪,終於搵 BOSE 借到 QC30 及 QC35,一次過試哂兩隻無線耳機,感受下實際用同去記者會速試嘅時候到底差幾遠。先講一下賣點,QC30 係左邊戴係頸個款,呢種設計絕對係藍牙耳機最佳設計,戴係頸完全唔會覺得頂住頂住,又唔會有咩重量,要嘅時候將耳機塞入耳機,唔要嘅時候放返落來,超方便。

BOSE_QC30_QC35_02

對於石先生來講,佢最大嘅賣點係耳機除左 QC20 都有嘅主動式抗噪外,最正係今次個主動式抗噪唔止得一個模式,仲可以較大細。如果出街跑步想聽番一啲環境聲保安全,可以將降噪調低,令你聽到一啲環境聲。如果想完全阻隔聲音就可以將佢開到盡,做到近乎完全隔音的效果。

QC30 呢個咁正嘅功能當日係記者會試完已經勁興奮,好想取代本身個隻 QC20,結果今次試完 QC30 都有同感。呢個可以調較嘅主動式抗噪真係好實用,但用途唔係街外,反而係 Office。因為平時戴耳機完全抗噪未必聽到同事嘅呼喊,反而降低少少,加番啲環境聲聽歌之餘,仲可以聽番啲環境聲,真係好正。

雖然咁正,但聽啲內線朋友講,今次呢隻 QC30 因為將個音量鍵同抗噪加減鍵做得好近,所以如果按得個抗噪加減鍵多,壞嘅機率都會提昇,最好都有用手機調較抗噪大細喎!

BOSE_QC30_QC35_01

講到 QC30 咁好,石先生會唔會換呢?呢個就係問題啦!石先生至今都仲思考緊,第一係因為平時用 QC20 主要係訓覺時戴住用,阻隔旁邊嘅嘈吵聲,以便好好睡覺,但 QC30 有個頸圈係到就唔啱訓覺用,所以他日石先生手上隻 QC20 真係爛左,都唔知買 QC20 定 QC30 好。

如果上面個個問題係使用習慣問題,咁跟住呢個就係不治之症啦!如同大部份嘅藍牙耳機一樣,QC30、QC35 都有一個通病,就係耗電問題。

你知啦!返工係 Office 又戴,搭車又戴,成日戴真係好鬼易無電。雖然用落佢大概都有 1 – 1.5 日嘅使用(官方指單次充電用 10 個鐘),但始終晚晚充電都唔係辦法。試過有日搭住地鐵睇英超,點知突然耳機無電,個下真係灰到爆炸。所以用得藍牙耳機真係要有日日充電呢個習慣。

BOSE_QC30_QC35_04

好啦!講完 QC30,同大家講下 QC35。作為一隻耳罩式耳機,QC35 其實幾舒服,特別係佢用電量可以去到 2-3 日左右(官方指單次充電用 20 個鐘),搭飛機時戴住佢夠哂方便。

因為佢真係戴落好舒服嘅原因,石先生都有拿佢去旅行,而 BOSE 好明顯真係將 QC35 設計來旅行用,因為佢有 QC30 無嘅飛機插頭,而且仲有一條 3.5mm 耳機線,等你可以將 QC35 由藍牙耳機變返做有線耳機,搭飛機起飛降落開住飛行模式都照聽到,真係一流。

QC35 同 QC30 都有嘅語音通話功能都有試用。根據電話另一方嘅回應,QC30 係通話時嘅準確度高啲,好少雜音,聽落也都清晰,但 QC35 唔知係咪設計上始終都無一個完全精準指住個口嘅收音咪,所以係收人聲嘅時候有時對唔準,會曚曚地,結果係有幾次都要轉番落電話傾先得。

(此文章授權轉載自合作夥伴stoneip.info

 







Categories: StoneTalk, 手機配件




   編者   

尤里 @MobileMagazine

尤里@Mobile Magazine總編 本人是智能電話狂人,玩轉晒所有系統設備,最熟悉Root機、刷Rom、手機優化等。創立網站的目的是想教識用家如何玩盡手機系統,發揮出智能手機的真正樂趣。網友們如何有刷機、Root機及優化上有問題,可以 facebook專頁及GOOGLE+專頁留言