謠言已經終結咗，呢個暑假唔經唔覺又已經開始咗，相信大家已經總算放下心頭大石，陸續 Plan 緊「返」日本玩。心動不如行動，筆者已經率先起行，上星期已經快閃嚟個東京之旅。去得玩就自然要買漫遊數據卡，近期筆者上網搵日本漫遊數據卡嘅時候，留意到一張之前未見過嘅漫遊數據卡，小編 keep 住勇於嘗試嘅精神，係近呢兩年都試過唔同品牌嘅日本漫遊數據卡，今次趁着快閃之旅，就試試呢張新嘅「熊仔卡」。
充值功能，下次旅行繼續用
點解叫佢做「熊仔卡」？係因為佢封面上面有一隻大大嘅熊仔，筆者見到封面嘅時候覺得有啲似台灣嘅乖乖零食。其實呢張漫遊數據卡叫做［iReborn 熊仔卡］，呢張熊仔卡同其他一次性嘅漫遊數據卡唔同，原來佢係用完之後唔使掉咗佢，可以上返網站「充值」再用，品牌聲稱覆蓋全世界超過50個地區，有好多唔同嘅服務計劃。只要你用完已經購買嘅漫遊服務計劃之後，就可以上返佢嘅網站再充值，幾適合一啲成日會去唔同國家玩或者做嘢嘅人，唔使掉咗張卡，又唔使再買卡。
▲用完之前嘅漫遊數據計劃，可以上返網站再充值。
東京實測，平均速度超過140Mbps
筆者喺七月中嘅時候快閃咗五日東京，喺佢哋品牌嘅網站見到一張 5 日 5GB 數據賣 $49，之後撳入去俾錢原來 $20 以上係包平郵，見到幾方便就買咗一張去試下。
呢張卡係純漫遊數據卡，並無電話撥出嘅功能，網站嘅介紹有講明用完 5GB 之後，會降速轉成 128kbps，使用 Docomo & SoftBank 的 4G/5G 雙網絡，一插上去卡槽等佢 load 一陣就可以即刻用到，事不宜遲即刻睇睇筆者呢 5 日喺大家大多數嚟東京都會去嘅 6 個地方，睇下張卡收得好唔好？
測試後感：雙網絡帶來嘅穩定
自從疫情開關之後，筆者都好似其他香港人一樣，「報復性」地去咗 7-8 次日本旅行，每次都會試吓唔同品牌嘅漫遊數據卡，所以大大話話都試咗 7-8 張唔同品牌嘅漫遊數據卡。用咗幾日感覺上呢張 iReborn 熊仔卡比我之前用過嘅，接收上可以算係最穩定嘅一張，就算唔靠使用感覺睇返數據，雖然測試出嚟嘅結果唔算係最快，但喺係呢幾個人來人往嘅地點都有速度唔錯而相對穩定嘅網速，平均嘅網速有 140Mbps，喺秋葉原更加有超過 240Mbps，論速度上亦算係非常之唔錯，可算係做到速度與穩定兼備，相信雙網絡互補嘅關係提供咗好高嘅穩定性。
▲用戶可以上返網站查詢數據流量。
筆者無論用 Google Maps 搵路搵嘢食、喺通訊軟件或者社交平台分享旅遊相同影片都非常順暢，另外用熱點分享俾其他如 iPad 的裝置使用都冇問題。但要留意返用晒 5GB 之後都係無限數據使用，但就會減速會去到 128kb，一般嘅文字通訊問題不大，但如果需要 upload 相片或者影片的話就會有些阻滯。而用呢張熊仔卡嘅用戶，亦都可以去返佢哋嘅網站輸入卡號查詢剩餘用量，可以睇住嚟用都係呢張卡比坊間一般漫遊數據卡多咗嘅功能，至少可以睇住情況就住用。一般嘅觀光客以每日 1GB 咁計其實都夠用，如果你係商務客又或者去到邊都係打緊機嘅朋友，需要大量上下載數據的話，都可以選擇更加高 GB 數嘅用量計劃，記住，物係死人係生，唔好俾日數或者 GB 數所限制，唔好計得咁盡，用得順暢，去旅行都會舒暢啲。
- BYD 攜手 Samsung 打造智能出行新體驗，Galaxy Watch 化身數碼車匙!
- HUAWEI Mate XTs 三摺屏新作更多資訊曝光！傳增至四配色選擇、一功能大幅加強使用體驗
- HONOR 細屏旗艦新機將轉用天璣 9500 !
- 【機價行情】REDMI Pad SE 8.7 再賣 $599！大鋪出機兼賺易賞錢、官網或可享 95 折現金券
- HUAWEI 曼谷發布會現場直擊！高攝力旗艦 Pura 80 系列正式登陸國際市場！新平板同時現身
