CMF Speaker M/S 試玩:玩味牛奶盒設計支援自訂面板,內建 Ultra Bass 兼具 18 小時續航

CMF Speaker M/S 試玩:玩味牛奶盒設計支援自訂面板,內建 Ultra Bass 兼具 18 小時續航



近年 Bluetooth 喇叭市場競爭激烈,Nothing 旗下子品牌 CMF 最新推出 CMF Speaker M/S,外型設計玩味十足,猶如一個鮮色牛奶盒。除咗搶眼嘅機身配色,喇叭更加入可更換面板同自訂旋鈕設計,畀用家發揮 3D 打印創意。音質方面支援 Ultra Bass 及 Auracast 功能,仲可以配對兩隻做左右立體聲,以定價 899 及 499 港元來講,對追求個人化設計的用家就有一定吸引力!



近年便攜 Bluetooth 喇叭選擇眾多,Nothing 旗下子品牌 CMF 最新推出的 CMF Speaker M/S 就喺外觀設計上玩出新意。有別於傳統喇叭,CMF Speaker M/S 採用猶如牛奶盒嘅破格造型,提供橙色及綠松色兩款鮮豔配色,外觀相當搶眼。

機身設計唔單止為咗好睇,廠方更加入高度個人化元素,機身正面面板以及控制音量、播放同跳轉曲目嘅實體旋鈕都採用可拆卸設計。有 3D 打印設備嘅用家甚至可以自行製作專屬面板及旋鈕,為喇叭賦予極大嘅 DIY 空間。

至於音質表現方面,CMF Speaker M 算係交足功課,應付各類型曲風都有清晰嘅人聲及細節。為咗彌補便攜喇叭低頻不足嘅先天限制,廠方特別喺 Nothing X 應用程式內加入 Ultra Bass 功能,透過 AI 演算法實時增強低頻力度,對於鍾意聽電子音樂嘅用家來講幾實用。此外,喇叭內建 Wide Soundstage 模式,能夠拉闊音場並提升樂器分離度。

連接方面,喇叭除咗對應標準 Bluetooth 無線傳輸,更支援 Auracast 廣播功能,一按機背專用按鍵就可以同時連接多部支援 Auracast 嘅裝置同步播放;如果有追求無損音質嘅需要,亦可以直接透過 USB-C 接口有線輸入音樂,配合長達 18 小時嘅電池續航力,整體硬件配置相當齊全。

如果想進一步提升聽覺體驗,用家可以透過 Nothing X 應用程式將兩隻 CMF Speaker M 配對成左右聲道立體聲,配合一橙一綠嘅配色放喺枱面確實幾有特色。定價方面,CMF Speaker S 建議零售價為港幣 499 元,而 CMF Speaker M 建議零售價為港幣 899 元。








Categories: 周邊試玩





   編者